Индустриски ДИЗАЈН

За насоката Индустриски дизајн се одлучив пред се поради специфичната структура на програмата која претставува комбинација од инженерски и дизајнерски предмети кои создаваат и овозможуваат техничка основа за работа во индустријата, а истовремено ја поттикнуваат креативноста и иновативноста на студентите во фазите на дизајн и развој на производи и услуги.

Би сакал да ја истакнам и професионалноста и посветеноста на професорите да го пренесат нивното теоретско знаење, како и нивната ангажираност за вклучување на студентите во реални проекти од индустријата. За време на последните семестри од моето студирање, имав можност да учествувам во проект за редизајн на возило во кој го применив наученото од студиите дотогаш, а истовремено се стекнав и со нови знаења и вештини кои ми помогнаа да продолжам со усовршување и работа во автомобилската индустрија за дел од најпознатите брендови на возила

За техничките науки покажував интерес уште во средношколските денови, па изборот за додипломски студии беше неминовен. Индустриски дизајн е смер преку кој студентот се стекнува со знаење од различни области кои го засегнуваат и инженерскиот и дизајнерскиот аспект.

Структурата на целокупната програма за студиите е формулирана на таков начин што студентот има можност да се пронајде во различни обласи од дизајнот, почнувајќи од производство па се до креирање на интерфејс на веб и мобилни апликации.

По завршување на студиите мојата кариера продолжи да се развива во областа на креирање виртуелни дизајнерски решенија преку кои секојдневно ја прикажувам мојата креативност, иновативност и аналитичност.

Дипломирав на насоката индустриски дизајн, а магистрирав на насоката индустриски дизајн и маркетинг на Машинскиот факултет во Скопје. Во текот на магистерските студии бев поканет да учествувам на реален проект помеѓу Машинскиот факултет и компанијата БРАКО / GREEN MACHINES од Велес. Директно учествував во дизајн процесот за изработка на кабина за постоечките возила GM500 и GM636 за чистење на урбани средини кои компанијата ги произведува, како и во развојот на новиот модел GM700.

Во текот на учеството во проектот добив можност и за вработување во истата компанија. Денес работам како индустриски дизајнер во компанијата каде продолжив со работа на понатамошниот развој на овие производи,  директно сум инволвиран во дизајнот и производството на возилата. Работата на реални проекти во текот на студиите нуди големи можности за стекнување практични искуства кои можат да го обликуваат понатамошниот правец на развојот на еден индустриски дизајнер.

Студиите по индустриски дизајн ми дадоа одлична подлога за истражување на сите можности што еден дизајнер ги има во кариерата. Во последниот семестар имав можност да работам на проект кој ме насочи кон она што го работам денес – дизајн за општествена корист.

Студиите ги продолжив на Politecnico di Milano, каде се надоградив во дизајнирање на системи од услуги и производи, со фокус на партиципативен дизајн и кокреација. Денес работам во СмартАп Лабораторија за социјални иновации во Скопје, каде преку дизајнерски методологии работам на развој и поддршка на општествени иновации од областите на климатски промени, образование и иновации во јавен сектор.

Дипломирав на насоката индустриски дизјан на Машинскиот факултет во Скопје во 2017 година. Моментално работам како UX / UI дизајнер во компанијата ЕНДАВА, интернационална компанија со повеќе од 10 000 вработени низ целиот свет.

Индустрискиот дизајн како студиска програма ни отвора многу врати и можности за понатамошна професионална кариера. Јас сум пример за некој што пробал различни насоки користејќи ги тие можности и основата која ја стекнуваме на факултетот. За сите оние кои се креативци и го гледаат дизајнот како можност за креирање и подобрување на секојдневните нешта кои ги користиме во животот, дали е физички или дигитален производ, насоката Индустриски дизајн е правото место да се започне тоа патување.

По препорака на Машинскиот факултет, како студент на пракса за првпат се сретнав со компанијата МЗТ ЕКА (сегашна ЕКА) во 2005 година и уште еднаш во 2008. Во текот на тромесечната пракса, ми беше понудена работна позиција како индустриски дизајнер.

Компанијата ме вработи во 2009 година како одговорен за дизајн и конструирање, но и за маркетинг на опрема за испитување шински возила. Во текот на годините имав можност за напредок во истата компанија и за неколку години добив прилика за промена на работната позиција на која сум и денес – менаџер за продажба на нашите производи на светските пазари. Моја препорака за идните студенти е да ја искористат праксата како една од најзначајните можности за вработување во текот на образовниот процес.

Во 2015/2016 година се запишав, а во 2018 дипломирав на насоката индустриски дизајн на Машинскиот факултет во Скопје со просечен успех од 9.93. Истата година се запишав на магистерските студии на програмата Индустриски дизајн и маркетинг на Машинскиот факултет во Скопје, а магистрирав во ноември 2022 година.

Во текот на додипломските и постдипломските студии имав можност да учествувам во повеќе национални и интернационални проекти од кои стекнав огромно искуство:

– Design With Social Impact Kenya 2017, меѓународна работилница во рамки на проект меѓу Машинскиот факултет во Скопје, Универзитетот за уметности во Цирих и Факултетот за уметност и дизајн на Универзитетот во Најроби.

– ГЕТ-Велосипед: Проект за изработка на електричен велосипед со проактивни филтери што беше кофинансиран од страна на Фондот за иновации и технолошки развој Скопје.

– Работилница Project Hub Импакт 2019: Проект со фокус на изработката на модели и анимации за аугментирана реалност, при што изработив стилизиран човечки 3Д модел.

– Темата за магистерскиот труд ја изработив во рамките на меѓународен проект помеѓу Машинскиот факултет во Скопје и истражувачкиот центар Virtual Vehicle во Грац, Австрија.

За време на студиите активно работев како фриленс графички дизајнер и аниматор, при што соработував со домашни и странски компании:  Пивара, Агротехна, Центар за странски јазици Ѕвонче, Charge America и други.

Во 2020, заедно со мој колега од студиите, основавме сопствена компанија МАД ЛАДС СТУДИО каде работиме како 3Д дизајнери