МЕХАТРОНИКА

Интердисциплинарниот пристап на насоката Мехатроника – комбинацијата на механика, електроника и програмирање, ми овозможи без проблем да се вклучам во индустријата како електроинженер. Благодарение на ова, денес можам да соработувам ефективно со инженери од различни дисциплини, како машински инженери, програмери и технолози, што е клучно за успешна интеграција на CNC системи и автоматизирани процеси.

За време на студиите имав можност да стекнам практични вештини користејќи софтвери со индустриски стандарди и машини. Особено корисно беше програмирањето на PLC контролери Unitronics, како и програмирањето на индустриски роботи (KUKA). Ова искуство ми помогна многу во професионалниот развој, бидејќи откако еднаш ќе се совладаат основните принципи, многу полесно е да се премине на работа со други PLC системи како Siemens, Beckhoff и други индустриски роботи.

Исто така, за време на студиите работевме на практични проекти кои ни овозможија да ги примениме стекнатите знаења во реални сценарија. Еден од најзначајните проекти беше дизајнирањето на робот количка, каде што користевме нискобуџетни драјвери за DC мотори. Ова искуство ми даде одлична основа за подоцна да преминам на работа со софистицирани и комплексни серво драјвери, како оние што се користат во индустриски CNC машини.

Студиите по Мехатроника ми дадоа широка техничка основа – од машински дизајн, преку електроника, до основи на програмирање и автоматизација. Таа интердисциплинарност ми помогна полесно да ги разберам комплексните инженерски системи и да соработувам со колеги од различни области. Универзитетското образование ми даде силна основа за логичко и аналитичко размислување.

Преку проектни активности, лабораториски задачи и практични вежби научив да го анализирам проблемот од повеќе аспекти, да ги идентификувам причините и да предложам изводливи решенија. Токму овој систематски пристап ми се покажа многу корисен при решавање на реални технички предизвици и донесување брзи, но добро обмислени одлуки.

Еден од клучните проекти каде што ги применив моите знаења беше мојот дипломски труд – развој на концепт за самобалансирачки мехатронички мотоцикл. Проектот вклучуваше поврзување на сензори, контролери и механички компоненти, при што ги комбинирав знаењата од повеќе области. Дополнително, учествував и во други практични активности каде што работев на имплементација на автоматизирани системи и анализа на нивната ефикасност.

Студирањето на насоката Мехатроника е неверојатно задоволство. Програмата ни овозможува да развиваме комбинирани знаења од механика, електроника, автоматика и компјутерско управување кој ги подготвува студентите за успешна кариера како одбрани стипендисти/вработени со креативен потенцијал вклучени во иновативни проекти. Професорите силно влијаат врз нашата способност за извршување на индивидуална и тимска работа преку учеството во  студентски проекти/активност.

За почеток се здобив со квалитетно теоретско знаење кое можам успешно да го имплементирам во пракса. Професорите и асистентите од насоката Мехатроника постојано внесуваа новитети во нашата образовна програма со цел да ја пренесат суштината на современата индустрија во која ние, како млади инженери, треба креативно и практично да се развиваме.

Ја зголемив мојата техничка самодоверба со работа на проекти менторирани од мојот институт Механика. Презентациите и семинарските работи ги обогатија моите ораторски способности и критичко размислување при решавањето на одреден проблем. Активно волонтирав во поголеми настани организирани од ФСС и факултетот како и низа на студентски проекти во кој ги развивав моите квалитети за тимска работа кои сега ме прават фер тимски играч кој флексибилно се приспособува на новата работна околина.

Насоката мехатроника која претставува синергија на машинството, електрониката и програмирањето ми помогна да развијам силна аналитичка способност и инженерски пристап при решавање на различни предизвици со кои се соочувам во работното секојдневие. Стекнав вештини кои ме подготвија да ги разгледувам комплексните системи од различни перспективи што е клучно за ефективно решавање на инженерските проблеми. Покрај тоа, од голема помош ми беа и голем дел од предметите што ги изучувавме во првите две години бидејќи се здобив со фундаментални знаења од други области на машинството без кои денес не би можел да ги извршувам тековните работни обврски.

Во текот на студирањето покрај теоретското знаење, програмата за мехатроника опфати и голем број на практични проекти кои ја поткрепија теоријата со реалната пракса. Овие практични проекти имаа големо значење за мене како студент, бидејќи ми ги доближија реалните сценарија и предизвиците што ги среќавам во текот на работата, што го олесни моето прилагодување и го направи преодот од теорија во пракса многу полесен. Голем придонес беше самото тоа што најголемиот дел од овие проекти се работеа во тимови и како резултат на тоа се стекнав со добри комуникациски и лидерски способности.

На крај сакам да напоменам дека сето ова се должи на огромната посветеност и професионалност на асистентите и професорите на програмата за мехатроника.

Машинскот факултет има одлични програми и дополнителни студентски активности поради кои на самиот крај од студиите веќе имав големо портфолио со проекти, многу од нив и во соработка со индустрија. Покрај тоа, начинот на кој се организирани студиите придонесоа за развој на моите аналитички и истражувачки способности, а преку насоката Мехатроника се стекнав со знаења од повеќе области – машинство, електроника и информациски технологии.

Таа основа ми овозможи да имам голем избор за специјализација во различни научни полиња, па мојата надградба ја продолжив на магистерски студии на Универзитетот во Јужна Данска во сферата на информациските технологии со фокус на развој на нови продукти, машинско учење и работа со податоци. Практичното искуство кое го стекнав за време на студирањето на Машинскиот Факултет ми помогна да се здобијам со позицијата лабораториски асистент уште во првите месеци од започнувањето на магистерските студии.

Тоа беше едно од највозбудливите искуства досега бидејќи покрај можноста да ракувам со различните индустриски машини, бев одговорна за обука на нови студенти за работа со лабораториската опрема, a притоа асистирав во процесот на изработка на прототипови како и пишување на научни трудови.

Додека студирав на Машинскиот Факултет, слушавме часови и работевме проекти кои беа од многу разновиден карактер. За да успеев и да применев практично тоа што го читам во книга, требаше да размислувам аплицирајќи ги практично методите кои ги учев. Факултетот ме навикна на брзина, логика, економичност и креативност, и ми даде голема самодоверба во животот. Овој начин на размислување ме направи спремна да ги решавам предизвиците во персоналниот живот, но и професионалниот.

Немам зборови да опишам колку благодарна сум што избрав Мехатроника. Не само што ги разбирам техничките проблеми во мојата струка, туку и активно сум дел од проблематики во информатички науки, финансии, економија, дизајн, менаџмент и многу други. Просто, ме научи суштината на проблемите да ја разберам и логично да им пристапам со моите знаења, без разлика на типот на индустрија. Во текот на моите студии, имав можност да учествувам во научни трудови кои беа иновативно применување на методите кои ги изучував, па така научив софтвери за аналитичко моделирање и симулирање кои понатака ми помогнаа за завршување на интердисциплинарен труд, во полето на медицината и срцевите заболувања. Освен тоа, ми овозможи да навлезам во блокчејн, да отворам мој старт-ап поврзан со блокчејн, мехатроника и сензори, со кој и моментално работам. 

Моето универзитетско образование ми обезбеди силна основа не само во стручната област туку и во вештините кои се неопходни за соочување со професионални предизвици. Најпрво преку различни задачи, проекти и истражувања стекнав способност за критичко размислување – да ги анализирам ситуациите од повеќе перспективи и да донесувам промислени одлуки базирани на факти, не претпоставки.

Дополнително техничкото знаење што го стекнав ми овозможи самоуверено да влезам во професионалниот свет и побрзо да се вклопам во работните процеси, поточно работата. Во текот на студиите работата во тим и комуникацијата беа постојано присутни преку групни проекти, дебати и презентации. Како и седењето после вежби и часови надвор од академските саати за подобро да го совладаме материјалот или вежбите, заедно.

Сето ова ми помогна да функционирам во различни тимски средини и да градам заеднички решенија. Организацијата и управувањето со време беа исклучително важни за балансирање на академските обврски, што сега се покажа како клучна вештина во работата под притисок и кратките рокови. Од сето ова највредна лекција беше дека учењето никогаш не завршува. Универзитетот ме мотивираше постојано да се усовршувам, да бидам отворена за нови знаења и да се прилагодувам на промените, многу важно за една динамична професија.

Студирањето на Машинскиот Факултет Скопје при насоката Мехатроника, ми помогна да ја пронајдам мојата страст за техничките науки кои ни даваат слобода да создадеме креативни решенија на вистински проблеми. Чувството на успех при создавање на реално опипливо решение, по макотрпен процес на анализа, дизајн и изработка, е неспоредливо!

Сеопфатната програма, насоката и поддршката од наставниот кадар, како и пријателствата стекнати за време на студирањето, беа вредна основа на мојот развој како машински инженер. Работата на студентски проекти, како и тимски натпревари, ми дадоа јасен поглед во тоа што значи да си инженер и како со заедничка соработка да се справиш со разни технички предизвици. Сето ова ми даде значително знаење и самодоверба успешно да се пласирам на пазарот на труд и да ја започнам мојата кариера како машински инженер. Кариерата ја започнав за време на моето студирање како практикант во повеќе фирми и оддели и работејќи на разни проекти во професионално опкружување. Интердисциплинарниот пристап, како основа на Мехатрониката, ми помогна успешно да се интегрирам во разни тимови решавајќи различни аспекти на развојот и производството.

За време на студиите на Машинскиот Факултет Скопје, стекнав цврста основа во области како што се механиката, конструирањето, инженерски материјали, мехатроничките системи и сл. Овие знаења директно придонесоа во мојот професионален развој, особено во работата поврзана со развој на опрема и производствени процеси. На пример, разбирањето на принципите на конструирање и анализа на податоци ми овозможи прецизно да ги дефинирам инженерските барања за дадени проблеми и да развивам соодветни технички решенија. Исто така, знаењата за интеграција на механички, електрични и софтверски компоненти стекнати на насоката Мехатроника во голема мера ми помогнаа при проектирање и имплементација на ефективни решенија во производната средина.

Математичките основи стекнати при студирањето на насоката Мехатроника создадоа солидна база за мојата кариера како научник и значително ми помогнаа да стекнам методологија на поставување и решавање на реалните проблеми во индустрија. Би ги издвоила предметите по веројатност и статистика кои моментално директно ги применувам во анализа на податоци и машинско учење. Уживав во сите аспекти на изучувањето на роботиката, како механичкиот дел (телото на роботот), така и интелигентниот софтверски дел (мозокот).  За време на додипломските студии стекнав силни основи во математика и физика.

Напредната математика од инженерските студии (калкулус 1 и 2, линеарна алгебра, и оптимизација) ми овозможија полесно и детално да ги разберам механизмите зад алгоритмите за машинско учење. Аналитичките методи и физичките принципи научени при решавање инженерски проблеми ми даваат уникатна перспектива при моделирање и оптимизација на реални системи. Оваа математичка ригорозност, комбинирана со мојата неуморна љубопитност, ми овозможува да развивам покреативни и поефикасни решенија на комплексни проблеми.

Отсекогаш сум била генералист, и верувам дека изучувањето на мехатрониката како мултидисциплинарно поле е исклучително вредно во денешниот комплексен свет. Моите студии ми овозможија да развијам способност да гледам врски таму каде специјалистите гледаат само граници. Интегрирањето на знаења од роботика, механика, електроника и софтвер ми дава креативност при решавањето проблеми и конкурентна предност во ерата на интердисциплинарни иновации. Можам да позајмам решенија од една област и да ги применам во друга, што е драгоцена вештина во современата технолошка средина.

Оваа широка перспектива истотака ми овозможува ефективна соработка со експерти од различни дисциплини.  Студиите по мехатроника не само што ми овозможија да продолжам со мастер по роботика во EPFL Лозана, туку ми помогнаа да развијам систематско размислување кое стана основа на мојот професионален идентитет.